Uvivu wa kufikiri umeua biashara ya filamu Tanzania

Kama Wabongo tungekuwa tunajua kupuuzia mambo ya ovyo kama tunavyofanya katika mambo ya msingi basi nchi hii ingekuwa mbali.

Nguvukazi nyingi inapotea katika mambo yasiyo na maana. Sina haja ya kuyataja mambo yanayotuchukulia muda wetu mwingi na pesa.

Wapenzi na wadau wa filamu walipokuwa wakipiga kelele kuhusu mustakabali wa tasnia hiyo, wahusika waliwapuuza kila mmoja akajifanya yuko bize akirekodi filamu.

Wasanii wengi walijidanganya kuwa mbona filamu zinatoka na umaarufu wao unakua kila siku, lakini wenye akili walikaa pembeni wakipiga kelele kuwa njia waliyokuwa wakipita haikuwa sahihi.

Wengine waliwaandalia mafunzo mbalimbali, lakini wao walijidanganya kuwa anayeandaa mafunzo hayo si maarufu kama wao, iweje ajifanye anajua zaidi ya wao.

Hata yalipoandaliwa matamasha ya filamu waliyapuuza, walijiona kuwa juu ya kila kitu ndio maana hawakuona umuhimu wa kuvifuatilia.

Sasa gwaride limepigwa nyuma geuka, kila msanii anatafuta pakushikilia hapaoni. Ni sawa na kusema kile walichokuwa wanajivunia sasa hakipo tena.

Wasanii wengi sasa hivi hawapo tena lokesheni kama wanavyopaita. Wengi wanaganga njaa katika mambo mengine, waliobahatika sasa wanafanya biashara zao wale wengine wanabaki kuruka huku na kule kuvizia  filamu chache zinazoendelea kuzalishwa.

Sasa hivi wakiitwa kucheza filamu za wasanii chipukizi kwa ujira wa Sh150,000 wanakwenda. Watafanya nini? Hawana ujanja tena.

Yote kwa yote mchawi wa soko la filamu nchini ni wasanii wenyewe kwa kuwa waliposhika hatamu hawakukumbuka kuwa wanaweza kushuka.

Katika kazi au biashara, hakuna kinachoweza kubaki juu milele kama haitakuwepo mipango thabiti. Yaani isingewezekana soko la filamu likabaki vilevile wakati watu ni walewale na kinachofanyika ni kilekile miaka yote.

Hakuna miujiza katika mafanikio. Tumeikuta Hollywood na tutakufa tukiicha na ubora wake. Ile haikushushwa kama neno la Mungu. Pale kuna watu wanakesha wakiumiza kichwa na kufanya kazi nini wafanye ili waendelee kushika hatamu.

Wengine wanafanya utafiti kujua nini wafanye ili waendelee kututawala kifikra kupitia filamu. Zipo filamu zilitengenezwa miaka 40 iliyopita lakini ukitazama ubora wake na utunzi ni zaidi ya ile itakayotolewa kesho na mtayarishaji wa Bongomovie.

Tatizo ni kutotaka kuwekeza nguvu katika mambo ya msingi. Wasanii walipoanza kupata pesa kupitia filamu ulikuwa mwanzo wa matatizo yao.